Exhbition in Tin Hau

經過一日曝哂＋激烈既wargame之後，就馬上搭車番屋企沖涼換衫，趕住去睇下SAT有份攪既展覽opening。成個人曬到熱辣辣，就算飲幾多支凍飲，都成身濕哂，仲要座住部壞冷氣既601巴士，真係熱上加熱。不過佢地呢次展覽都好成功，門口逼滿哂人。因太多人既關係，我都只係睇左門口個web cam 做出油畫效果既裝置，影左幾張相就走了，等遲下少人Ｄ再慢慢睇過！

RIGHT CLICK: Open Source New Media Exhibition
24/5 - 13/6/2007
10:00 am - 8:00 pm (Mon-Fri)；12:00 pm - 7:00 pm (Sat-Sun) * free
Kapok Gallery ,9 Dragon Road, Tin hau

Wargame初體驗

早在１個月前張狗巳約好佛誕假期打wargame，咁大個仔都係第一次玩。不過今日天氣真係太好，好曬好熱，仲要著住長袖迷彩衫褲同埋帶住個面罩周圍走，連抖氣都辛苦，仲成腳泥同周身被蚊叮！不過玩落都幾好玩，下次都係等秋／冬天搵埋狗sir再玩過就更好啦！

Today's good news #2 老媽子變“ 嫲婆“

咩叫好事成雙？今日我終於深深體會到啦，下午除左收到老媽子的來電外，還收到陳生（即係我阿哥）的來電，今晚帶埋阿媽出街食飯。平時佢都好少打來搵我，今日又有咩野事呢？原來 Alvin姐有左呀，佢１２月就做老豆啦！哈哈....我聽完之後都鄧佢地開心，仲講笑咁問佢“ 做咩咁吾小心呀！“ 今晚本來打算去“ 金戶亭“ 食晚飯，不過真係日日都咁鬼多人，都係去佐敦食印尼野啦！Alvin姐屋企人都係印尼華橋，以前細路都係去開呢間印尼餐館，不過價錢較觀塘既貴，不過佢地既印尼炒麵，巴東牛肉同埋蜜糖雞翼真係好好食呀！
７月份家姐就會生個BB仔，老媽子就做阿婆，１２月到Alvin姐，到時老媽子就做阿嫲啦！一年之內做哂阿嫲同阿婆！
希望陳生就快做人老豆就生生性性，俾心機搵錢，吾好咁大洗，兩公婆恩恩愛愛，身體健康，Alvin 姐吾好打排球啦，生完先打啦！

Today's good news #1 陳綺貞-花的姿態 演唱會經典實錄2CD+DVD

自從16/5晚睇完陳老師的live表演後，呢排我的ipod長期播放著她的playlist。當晚她的演出真的“ 冇得彈“ ，能夠看到她的現場表演，真係十分幸福！不過當晚時間比平時紅館show較短，由８：３０唱到１０點到，有好多我喜歡的歌都冇唱到。演唱會門外有得預訂陳老師上年在台灣的演唱會ＤＶＤ boxset $180(包運費），最初還以為過１﹣２日便會送到，但從網上得之有些朋友巳經收到，呢幾日都好心急等待它的到來。終於今天下午收到老媽子的電話，“你的郵包送到來了！“ ，今天晚上便可看過痛快，馬上將所有歌入落ipod日日聽！這隻碟我覺得真是十分值得買，設計精美，有ＣＤ聽，有ＤＶＤ睇，有海報送，還有陳老師的信和她的個人資料！

2007 Cheer Summer Tour

等左咁耐，都終於等到陳綺貞再黎香港開演唱會，繼上次生力wild day out係尖咀既不愉快經歷，呢次點都要拿拿聲打電話訂飛！不過所有$199門票巳一早賣哂，只好買$299，係幾貴，不過有得睇綺貞老師既live，同埋都座得幾前都係抵架！吾知到時有冇係台灣剛剛出既演唱會2 CD+ＤＶＤ 既box set 賣呢？仲有２日！

Mother's Day Lunch

今日母親節，中午帶左老媽子去觀塘食佢最愛既印尼餐，上面果碟係佢點既“Longdon 十五夜“，而下面果碟係我點既“黃薑飯“ ，有炸雞，蛋，巴東牛肉，雜菜，人小小又想食多幾樣餸叫呢碟就最啱，之後我仲叫左半打雞沙嗲同一杯青檸梳打。老媽子因感冒未清，沙嗲吾食連一向最愛既三色冰都冇叫。希望佢快Ｄ好番，日日都健健康康，黎緊六月生日再去食多次啦！