Jon & Amber wedding photo by Hexar

今日一收工即刻走去八月照相館拎相，不過途經旺角一間新開專賣中式飽點店鋪，都幫親番個菜肉飽試下先，行經肥媽間鋪，都吾少得整番串魷魚加辣啦！等左幾日先至有得睇番果日用hexar影既相，菲林相機就係冇得即時睇番影出黎既效果，成日都要等幾日至有得睇，有時吾好彩，可能成年前影既相，要等影哂成筒菲林先見人！不過今日睇番Ｄ相，等下都係值得架！菲林同數碼機影出來既感覺都係好吾同，而可能因為hexar擁有大光圈＋後快門，支鏡頭質素又真係不錯，影出黎既相都好sharp好清，最衰有幾張相揸得吾夠定，同埋focus錯左，如果吾係就perfect 啦！不過我都要努力練好Ｄ構圖同用熟Ｄ部機先！Hexar呢部機真係冇買錯，希望你平平安安，同我一齊記錄低每個重要時刻！
PS:大家可到以下網頁睇下Ｄ相啦！
http://fotologue.jp/grd727

929- Jon & Amber wedding day!

昨晚預備今晚要播既歌都攪到３點至訓，今朝一早５點幾起身，又飛去將軍澳拎㩒花入屯門。不過呢幾日既辛苦都係值得既，所有兄弟姊妹都替你們高興！由IVE識佢地倆位，至今都差不多７年啦，今晚都係第一次親身睇到新郎哥拉小提琴！今晚最攪笑既環節，都相信係“尋找新郎的遊戲“ 啦，經我地既美指阿Ｂ小姐既化妝同做型設計，離遠睇都真係好難認得出！我諗呢次都係我人生中第一次同最後一次做婚禮MC，講野絕對係我最吾掂既一環，我都係做番Ｄ幕後影下相，拍下片，剪下片，播下音樂好過啦！Sorry la!German姐！最後真係希望你地白頭到老，永結同心，快Ｄ有自己既屋同ＢＢ啦！

當晚新郎與新娘!

王老太重現旺角！

終於見到你！

呢幾年中秋都成日落雨，仲以為呢幾日落雨天都見吾到個月亮，點知今日趕去荃灣食過節飯既時候，抬頭一望，成個天又冇咩雲，用肉眼都好清楚咁見到個又圓又大既月亮。細個開始就好鍾意望月亮，一路搭車一路望，點解個月亮好似我地去到邊就跟到去邊咁既！今個中秋第一次同成家人出去酒樓過節食飯，仲同左世皓B 玩左成晚tim!ha ha......




二手ＢＢ車初登場

BB冇眼睇啦！

OT良伴-收音機

今年開埋中六，都估到會好多野要做，好多lab要試，所以都諗住買番部收音機看下門口。細收音機仔自己都有部，不過成日要插住headphone聽，做起野上黎始終吾方便。用電腦網上聽又成日聽聽下斷線，或者連吾到線冇得聽。有日行開深水埗，見到佢又幾靚仔，收得又幾清，都係百零蚊有交易，一於帶佢番公司啦！一個人做野都真係幾悶，開住部收音機都係想聽下歌，多把聲講下野，好似有個人係度陪緊你做野，等你冇咁悶唶！

Strida 5.0 (sport)

等左好耐，恨左好耐，諗左好耐，最後都係將佢帶左番屋企！阿媽見到到呢個包裝仲問我做咩買個吉他番屋企，當佢知道原來係架單車黎既時候都嚇左跳！買佢既原因，係因為可以摺得埋，帶得上巴士、地鐵同火車，有得推住行又吾駛背住周圍走，雖然身形吾夠Abike細，但係佢踩得夠舒服！都預計到今年會比較夜收工，有左佢就吾駛再等273A，又吾駛行出去火車站，放假既時候又可以周圍踩。不過都係秋天踩單車最好，吾會踩到成身汗...............！

電玩文化展@數碼港

喜歡打機既朋友，一定不要錯過這個展覽，事關內裹展示電玩遊戲既發展由大大部街機玩space invader 到最新既PS3,Xbox次世代家庭遊戲機都一次過擺哂出黎，連細個果陣有玩過既任天堂手提遊戲機都有得玩。入場費每位$50,記得早Ｄ入場，由朝打到晚，打番夠本！

陳生大日子

是日係大佬結婚既大日子，因時間太急，一切從簡。不過阿媽杯新抱茶又點走得呀！希望阿哥做左人老公就生生性性，俾心機揾銀，好好照顧阿嫂！祝佢地百年好合，永結同心！快Ｄ生番個ＢＢ仔等我做阿叔！

李阿Ｂ滿月啦！

時間過得真係快,一轉眼又過左1個月啦!喂喂......呢位小朋友吾好咁炆熷至得架!雖然你爸爸媽媽仲未諗到幫你改咩名好!都吾駛咁炆既,擺滿月酒應該要開心d至得架!今日你係主角黎嫁!

係囉!宜家咪幾靚仔!大家睇吾睇到原來阿B哥發炆熷前同後,成塊面都紅哂,係眉頭間會"谷"起兩粒野架!ha ha....你真係好得意呀!

30' something

30對男仔來講係咪一個關口，2字頭都仲可以叫男仔/死靚仔，到左3字頭就叫做佬! 運動越來越少，脂肪越來越多，吾只人老左，責任也越來越重，家姐，阿哥都結哂婚，搬哂出去住，又要開始擔起頭家，屋企就得番你同阿媽。身份也不再只係人地個仔/細佬，宜家做埋舅父仔，遲下聖誕仲做埋阿叔。公司方面原本仲以為擁有車路士咁強既理科陣容，諗住熟哂佢地Ｄ踢法，強陣應付CE,a-level,新高中，就實sure win，點知天意弄人，一下子換哂３科老細，全部轉哂會，所有野還原基本步。令我明白到離開不只容易，傳染性重勁過SARS，留底需要更大的勇氣同耐性去堅持自己既理念。自身方面，究竟到左30歲既目標係咪要有車，有樓，有份高薪厚職，有老婆仔女？到呢刻以上列出既野我一樣都未達到，睇來都仲相差十萬百千里，都真係要等中六合彩jetpot頭獎至得！仲有一個謎既就係，到30歲先至有拖拍既預言會否成真呢？Everybody please stay tune...............

北角半天遊 1.0

今朝的任務就係要運送一大碗薑醋，去家姐位於炮台山既寫字樓。因姐夫同家姐都好想試下德成號既馳名蛋卷，跟住就由炮台山行落北角，雖然天氣比較熱，但都總好過留係屋企發呆。可能早去到，入面仲有好多存貨，每盒$45，咁就買3盒椰汁蛋卷番去俾佢地試下啦！(聽姐夫同狗sir既食後評語，係好好味架，家姐果2盒都就黎俾姐夫食哂啦!) 我就一條都未食過啦，下次要買番盒原味試下至得！

北角半天遊 1.1

既然黎得北角，梗係吾少得去幫親下“13座牛雜"啦，自從上次同班ive同學仔去東寶食飯前試過之後，一直都掛住佢又“林"又入味既牛雜，夠膽講佢係全香港最最最好味既牛雜！原來宜家佢地搬左鋪，仲易搵，就係新光戲院隔離，宜家仲賣埋樽裝凍奶茶同咖啡，都真係幾好飲，茶同奶既比例又剛剛好，又不會太甜，大家真要試下！好想試埋附近出名既雞蛋仔，因時間同肚既quota有限，只好留待下次再食過啦！Ai.......對住咁多美食，如果能同更多好朋友一齊分享就真係冇得彈啦！

多謝你！

今日睇完“變型金剛“後，狗sir就帶左我地上去海運停車場頂樓睇風景，咁大個仔都係第一次上去。平時去海運睇戲，行街食飯買野都試過，仲好記得以前考完會考係海運既“馬里奧“ 做過waiter暑期工，成日係後欄碼頭對住個海食飯，忙左成日對住咁靚既海景，成個人都精神哂，可惜當時未有錢買相機，未能拍底當時影象。今次一上到去就剛好黃昏時段，立即影番夠本啦！睇完個幻彩詠香港，我地就去左興發食打冷，作本人生日前的慶祝，多謝狗sir & 莎朗！

暑假第2天:中環美食團

難得今日german姐又放假，就帶佢去試下永樂園最出名既熱狗，今次就試左個$9 孖腸熱狗，個熱狗飽熱辣辣外層脆卜卜，自家制蛋黃醬真係好好味，熱狗腸係用外國鑵頭腸，味道比較普通，整體來就都吾錯，藉得一試！跟住就去左H&M行番轉，不過今次冇野睇得上眼，空手離場。等過左個繁忙既lunch hour，我地先殺上去結志街既勝香園鐵皮檔茶餐廳，試下佢地出名既番茄湯麵，我要左個番茄牛肉＋火腿腸麵，再加支冰凍大可樂，真係冇得彈！不過大家都係吾好係最熱既時候去，因為果樹係露天冇冷氣呀！不過今次吾係好肚餓，冇叫佢地好好味既麥多混醬脆脆！

正式放暑假第一天

一朝早又俾老媽子整爛左個風扇頁，為左對付呢幾日既酷熱天氣，第一時間打電話去樂聲維修部仲有冇存貨啦。今日既行程先去葵涌買風扇頁，跟手拎埋個煲俾家姐裝薑醋，順便探下阿B啦！難得平日來到荃灣，梗係去嘉樂冰廳試下個茶餐啦！樣樣野食都係加大版，火腿奄列超大份，連杯凍奶茶都大杯過出面既茶餐廳！
食完個超飽tea，就去探下阿B啦！不過今朝早去完鎊重之後就炇憎左成日，又訓得吾好，一睇就知佢幾吾happy啦！希望佢快Ｄ好番，等爸爸媽咪有覺好訓啦！

張狗家又多左2位新住客

是日作客張狗家打機大戰，係打機途中，突然發現２位陌生物體出現，就係圖中呢２位黑白雙貓，吾好睇佢地好似好文靜，其實佢地都好爛玩，一個鍾意玩波，一個鍾意玩棍。喜歡養貓或想養貓既朋友，必定要買番本小克所畫既偽科學鑑證2之殺出香港，因內有詳細記錄好多養貓既苦與樂。今日順便把家中擺左好耐既Victor版sega saturn遊戲機帶俾佢試下仲玩吾玩到六打炸彈人，最終都係咩碟都load吾到！現誠徵Sega Saturn主機一部，操作正常，正版／老翻碟均可讀到，有意出售者可聯絡本人，薄酬。

BB你好嗎？

燈..燈..燈...凳！各位觀眾，等左成日，終於都見到你啦！你真係好得意bor！我覺得你對眼就似媽咪，鼻以下就似爸爸！一睇你既反應，老媽子實係太耐冇湊BB啦！等你出左院後再探下你，再影多Ｄ靚仔相啦！希望你健健康康，聽教聽話，快高長大.......................!
PS *吾知你又會吾會鍾意聽音樂同睇戲呢？因為你都有同我地一齊睇電影節同睇concert呀！若果你大個仔既時候同你一齊去睇戲／concert，果種感覺都真係好Amazing!!

2007年7月10日

今朝一早收到家姐的來電，還以為問下老媽子的近況，點知原來係佢穿左羊水，宜家係醫院等緊生仔。我問佢幾時生得，佢估未有咁快，但係快則一陣，慢則可以1~2日！收線後，即刻打電話通知老媽子，叫佢準備定，等我收工果陣即刻趕去醫院探家姐！跟手成個下晝都係度擔心緊幾時會生得呢？到4點幾收工果陣都未收到任何消息，就馬上拿拿聲搭火車落旺角探家姐啦！點知火車去到太和果陣就收到姐夫既電話，BB係4點40分到非常順利咁出左世啦，不過實在太快啦，姐夫都趕吾切去睇BB出黎果一刻。
可能今日真係好多BB出世，我地成家人等左好耐都未能見BB一面。探病時間又就快完，要等到聽日先可以見佢一面。
究竟BB係點樣既呢？似媽咪定爸爸呢？定係似舅父仔呢？呢個迷就等我謝夫陳聽日再同大家揭曉！

5周年畢業禮

咁大個仔都係第一次係沙田大會堂出show，地方真係好鬼死大，設備又真係好掂。不過今次工作真係吾算多，light que 同 sound que 都吾駛落手落腳攪，因為場地不準上control panel，又少左個偷師機會啦！若果下次再攪既話，d que真係要寫得更加詳細，俾樓上既師父易Ｄ跟，吾駛俾人笑。呢次最辛苦既，並不是表演當日，而係昨日，一個人拎住４０枝花炮由深水埗抬番上水 ，途中仲要去買其它野，拎拎下個袋仲開始穿，好在係間樓上鋪老細幫我pack左落個紙箱。好在Ｄ花炮效果真係好正，我都想玩呀！玩果陣就好開心，玩完之後真係掃餐死！

我是一張摺凳！

今日行宜家果陣，係臨走果陣俾我見到呢張凳，最初都冇留意佢個名，見到佢都幾靚仔，又有紅,白,黑三色，不過一座落去又真係吾係咁穩陣，即時打消購買既意欲！

實力派！

多謝nana姐既介紹，近排ipod常常播既歌。聽下原唱者既表演先啦！



不過睇埋下面呢位參賽者既演繹之後...............



係咪好聽過原唱呢！聽埋呢首又覺得點呢？


勁呀！連憶蓮既歌都唱得咁好聽，個天好公平既，吾會將所有好野俾哂你，好聲又未必會靚仔！不過如果佢出碟既話，我會買番隻支持下！
佢叫楊宗緯，大家想睇多Ｄ佢既歌，可以去youtube揾下！

跟蹤

經狗sir大力推介，又見今日星期二睇戲有平，考慮左一陣就去買飛睇場7:40。雖然好多演員都係杜sir班底，有任達華、梁家輝、邵美琪、肥雪、馬尾、白頭佬等~ ，但係睇落啲拍攝手法又吾係好似杜sir，個故事都寫得幾好，都幾緊張刺激，藉得入場支持!!

糯米飯

記得以前細個屋村樓下有一檔賣豆漿糯米飯，每逢星期六日朝早都會買碗糯米飯或車仔麵番鋪頭食，一面食早餐，一面睇卡通片，真係最佳享受。不過自從舊屋村清拆，好多好好味既街邊小食都消失哂，好掛住啲魚球，翅麵，潮州佬炸豆腐.........
今日見睇戲前仲有大把時間，走落花園街食番碗糯米飯重溫下童年回憶，一碗普普通通既糯米飯，有啲蝦米，花生，蔥，最緊要多啲豉油，對我我來講巳經係好好既晚餐！

再次到訪OOO

今日去完科大聽完talk，就同兩位小朋友去睇下衫，佢地正頭痛緊謝師宴當晚著咩衫，由尖咀搭船過中環H&M，不過實在行到好肚餓，去左交易廣場既Triple O食最好味既漢堡包同埋薯條，今晚仲試埋炸雞柳，真係好好食又彈牙，點埋honey mustard仲好食呢！不過食完之後巳經９點，去到H&M門口就夠鐘關門啦！

這個夏天不能沒有你........

今朝一早就醒左，原因並不是聲音吵醒或陽光曬醒，係因為阿姨既到訪，好意外咁將我把電風扇整壞而熱醒左！平時有得用既時候都吾覺佢有幾重要，但今個下午就深深體會到，又熱又成身汗既時候係吾會訓得著或者進行任何活動！於是便立即換衫落觀塘買把新風扇，行左幾間電器鋪，最終係一間家庭式電器鋪頭仔揾到最平($398)又有我最喜歡既自然風功能！舊時屋企冇冷氣果陣就好恨裝番部，但宜家裝左之後就因為電費貴又吾敢開！

大人の科学 Vol.15 紙菲林投影機

係大家既右手面就係最新一期既大人之科學vol.15既封面，今期介紹電影同動畫既發展歷史同原理，仲介紹一些8mm既器材。呢期既投影機都吾係好難砌，最麻煩既就係整果Ｄ紙帶菲林，又要剪，又要駁，仲要拮埋Ｄ窿！幾經辛苦終於砌好部機同２餅紙菲林，用番amazon個紙盒再加張A4紙就作為螢幕，熄哂prep room既燈，開著部機，用平均既速度咁攪餅紙帶，就可以睇到套短片，我第一套播既就係小飛俠黑白卡通，另一面就係Honda 機械人Asimo短片。DV就拍得多，都想試下拍下8mm，好耐之前都試過係深水埗遇過一部8mm機，都有考慮左一陣，不過最終見佢個電池箱好污穢先冇買到！吾知幾時先有緣俾我遇到部靚仔既8mm機呢？

又再幫襯amazon.co.jp

之前都試過係amazon jp訂過，吾駛１個禮拜就收到要訂既書，今次係27/5晚訂左幾本大人之科學，2本科學玩具同埋1本GRD既相集，終於係5/6下午2點幾送到屋企。每次都想訂多幾本大人之科學，但因每月既quota有限，只好隔一排儲夠數先訂，好在家姐之前去日本果陣幫我買左第３期(針孔相機＋自己沖曬)，因為日本果面都斷左貨，都吾會再訂得番！宜家仲爭第2,4,5,7 &8期未買，好快就儲齊成套大人之科學啦！

快Ｄ放暑假啦.............

呢排天氣開始越來越熱，好似我呢Ｄ汗怪，係出面企一陣巳經身水身汗。不過見到出面藍天白雲，都真係想出去打下波，浸下水，踏下單車。或者拎埋Ｄ相機，行走港九各大街小巷，飲下食下，都好想試下中環“永樂園“ 既熱狗係咪真係咁好食？或者試下北角有間茶餐廳既“茶走“,同埋“阿鴻小吃“出名既鹵水野食！不過係咁食都係吾掂當，做多Ｄ運動減下個肚腩好過！希望係呢個暑假操番fit Ｄ至得！吾知幾時至學識遊水呢................??

Exhbition in Tin Hau

經過一日曝哂＋激烈既wargame之後，就馬上搭車番屋企沖涼換衫，趕住去睇下SAT有份攪既展覽opening。成個人曬到熱辣辣，就算飲幾多支凍飲，都成身濕哂，仲要座住部壞冷氣既601巴士，真係熱上加熱。不過佢地呢次展覽都好成功，門口逼滿哂人。因太多人既關係，我都只係睇左門口個web cam 做出油畫效果既裝置，影左幾張相就走了，等遲下少人Ｄ再慢慢睇過！

RIGHT CLICK: Open Source New Media Exhibition
24/5 - 13/6/2007
10:00 am - 8:00 pm (Mon-Fri)；12:00 pm - 7:00 pm (Sat-Sun) * free
Kapok Gallery ,9 Dragon Road, Tin hau

Wargame初體驗

早在１個月前張狗巳約好佛誕假期打wargame，咁大個仔都係第一次玩。不過今日天氣真係太好，好曬好熱，仲要著住長袖迷彩衫褲同埋帶住個面罩周圍走，連抖氣都辛苦，仲成腳泥同周身被蚊叮！不過玩落都幾好玩，下次都係等秋／冬天搵埋狗sir再玩過就更好啦！